نئی دہلی، 6 جنوری (آئی این ایس انڈیا)ایک این جی او کے رضاکار سنگھو بارڈر پر احتجاج کرنے والے کسانوں کے لئے دو بستروں پرمشتمل عارضی اسپتال بنانے کے منصوبے پر کام کر رہے ہیں۔

این جی او ’لائف کیئر فاؤنڈیشن‘ نے گذشتہ سال 30 نومبر کو سنگھو بارڈر پر میڈیکل کیمپ لگایا تھا۔ فارماسسٹ اور این جی او کے رضاکار صادق محمد نے بتایا کہ بارش کی وجہ سے ان کا منصوبہ تاخیر کا شکار ہے۔ انہوں نے کہاکہ ہم نے بدھ سے ایک ایمرجنسی ہسپتال شروع کرنے کا منصوبہ بنایا تھا لیکن بارش کی وجہ سے اس میں تاخیر ہوئی ہے۔ بارش کا پانی ہمارے خیمے میں ٹپکنا شروع ہوگیا، ہم بدھ کے روز ایک بہتر واٹر پروف (واٹر پروف) خیمہ لگائیں گے۔

صادق نے کہا کہ غیر سرکاری تنظیم کے پاس آٹھ رضاکار ہیں، جن میں فارماسسٹ اور ٹیکنیشن شامل ہیں۔ وہ پنجاب کے ضلع موہالی سے سنگھو بارڈر پر آئے ہیں۔ ایک اور رضاکار اوتار سنگھ نے بتایا کہ کیمپ میں بدھ سے ای سی جی کی سہولت دستیاب ہوگی۔ دہلی میں منگل کو لگاتار تیسرے دن بھی بارش ہوئی، تاہم شہر کا کم سے کم درجہ حرارت 13.2 ڈگری سینٹی گریڈ تک بڑھ گیا، جو عام سے 6 ڈگری سینٹی گریڈ زیادہ ہے۔

غیر سرکاری تنظیم کے رضاکاروں نے بتایا کہ ان کے پاس دل سے متعلقہ پانچ مریض ہیں۔ سنگھ نے کہا کہ ہم مظاہرین کو ہنگامی خدمات فراہم کرنا چاہتے ہیں، اگر کسی کو دل کا دورہ پڑا تو فوری طبی مدد سے اس کی جان بچائی جاسکتی ہے،ہم حکومت سے قریبی اسپتالوں کے ساتھ مل کر کام کرنے کی درخواست کرتے ہیں تاکہ مظاہرین کا بروقت اچھا علاج ہوسکے۔

انہوں نے بتایا کہ دو بستروں پر مشتمل یہ اسپتال 24 گھنٹے چلے گا اور دو ڈاکٹر مریض کی نگرانی کریں گے۔ صادق نے کہاکہ اگر کسی مریض کو کوئی سنجیدہ مسئلہ ہے تو ہم اسے اسپتال میں داخل کرنے کی سفارش کریں گے۔